Söguland – stærðfræði

Guðbjörg Pálsdóttir dósent í stærðfræðimenntun við Menntavísindasvið HÍ hefur haldið margskonar námskeið sem tengjast stærðfræði og eitt af þeim er Stærðfræði og barnabækur. Eins og nafnið gefur til kynna er verið að benda á hvað stærðfræði leynist víða og hve auðvelt er að leika sér með sögurnar. Guðbjörg bendir á Söguland sem góðan grunn í vinnu með stærðfræði utan hefðbundinnar kennslu. Í Sögulandi fer kennarinn í hlutverk og börnin taka virkan þátt. Notuð er einhver kveikja eins og til dæmis bréf frá sögupersónu sem er í vanda… getum við hjálpað?

Hérna má sjá myndbandið KS1 Drama in Maths – Drama for Learning til að kynnast nánar Sögulandi.

Er virk málstefna á þínum starfsstað?

Málstefna Reykjavíkurborgar var samþykkt 19.maí 2018. Þar segir meðal annars: ,,Vandað, skýrt og auðskilið mál, hvort heldur ritað eða talað, er lykilatriði í allri þjónustu og stjórnsýslu Reykjavíkurborgar. Þar er íslenska í öndvegi og skal hún vera til fyrirmyndar í samræmi við þingsályktun um íslenska málstefnu frá 2009 og lög um stöðu íslenskrar tungu og íslensks táknmáls nr. 61/2011. Í sömu lögum er kveðið á um að ríki og sveitarfélög beri ábyrgð á að varðveita og efla íslenska tungu og skuli sjá til þess að hún sé notuð (2. og 5. gr.).“

Málstefnuna má finna í heild sinni hér. Málstefnan gildir á öllum starfsstöðum Reykjavíkurborgar og á starfsfólk að taka mið af henni í störfum sínum og samskiptum.

Vefurinn Nemendur með íslensku sem annað mál

Helga Hauksdóttir kennsluráðgjafi á Akureyri heldur úti vefnum Nemendur með íslensku sem annað mál. Þar er hún búin að safna gagnlegu efni frá ýmsum aðilum, m.a. Reykjavíkurborg, og flokka það niður á aðgengilegan máta.

Gefðu 10 – Ekki bíða, byrjaðu strax!

Gefðu 10 er einföld aðferð ætluð til þess að auka samræðu og samskipti við fjöltyngd börn sem eru að læra íslensku sem annað mál. Hér má nálgast bækling sem fjallar nánar um þessa aðferð.

Barnakosningar í Laugarseli

Barnakosningar eru skemmtilegar og mikilvægar leiðir til að kenna börnum að þau hafi áhrif á umhverfi sitt. Í Laugarseli hefur verið notast við ýmsar aðferðir til að virkja lýðræði þannig að börnin geti komið sínum skoðunum á framfæri.

Reglulegar kosningar, þar sem allir í frístundaheimilinu hafa kosningarétt, er ein af aðferðunum sem unnið er með.

Lilja Marta Jökulsdóttir var með málstofukynningu, á uppskeruhátíð frístundamiðstöðvanna í Reykjavík Höfuð í bleyti 2019, þar sem hún kynnti nánar kosningarnar.

Kosningaferlið má sjá hér (birt með leyfi LMJ).

 

Laugarsel er fyrsta réttindafrístundaheimilið í Reykjavík og jafnframt fyrsta í heiminum ásamt Krakkakoti í Garðabæ.

Unnið er með barnasáttmála sameinuðu þjóðanna og þá alveg sérstaklega eftirfarandi greinar:

  • 2.grein Jafnræði – bann við mismunun
  • 3.grein Það sem er barninu fyrir bestu
  • 6.grein Réttur til lífs og þroska
  • 12.grein Réttur til að láta skoðanir sínar í ljós og til að hafa áhrif

 

Flæðilestur

Í leikskólanum Hulduheimum er flæðilestur með yngstu börnunum – en hvað er flæðilestur?

Markmiðið með flæðilestri er að barnið læri að njóta bóka. Þetta á vel við á ungbarnadeildum leikskóla og jafnvel fyrir eldri börn.

  • Flæðilestur er hluti af hópastarfi.
  • Hópurinn samanstendur af kennara og fjórum börnum.
  • Valin er bók sem hentar þessum unga aldri.
  • Bókin er lesin fyrst fyrir allan hópinn.
  • Síðan er sama bókin lesin fyrir hvert barn.
  • Barnið situr í fangi og stjórnar bókalestrinum.
  • Spjallað er um bókina um leið og lesið er.
  • Hin börnin sitja með og hlusta eða eru að leika sér, það er þeirra val.
  • Þannig skiptist kennarinn á að lesa sömu bókina fyrir hvert barn í hópnum.

Í flæðilestri heyrir hvert barn sömu bókina lesna aftur og aftur. Fyrst þegar er lesið fyrir hópinn og einnig þegar verið er að lesa bókina með því og hinum börnunum. Endurtekningin er hluti af námi barnsins.

Fingraþula

Hver kannast ekki við Fingraþuluna?

Þumalfingur er mamma sem var mér vænst og best.
Vísifingur er pabbi sem gaf mér rauðan hest.
Langatöng er bróðir sem býr til falleg gull.
Baugfingur er systir sem prjónar sokka úr ull.
Litlifingur er barnið sem leikur sér að skel.
Litli pínu anginn sem dafnar svo vel.

Hér er allt fólkið svo fallegt og nett.
Fimm eru á bænum ef talið er rétt.
Ósköp væri gaman hér í þessum heim,
ef öllum kæmi saman eins vel og þeim.

Fríða Bjareny Jónsdóttir var með fyrirlestur sem fjallaði um orðaforða og samskipti, með áherslu á að skoða muninn á samskiptaorðaforða og dýpri orðaforða. Eftir fyrirlesturinn lagði hún verkefni fyrir hópinn til að vinna með út í leikskólunum. Hún gaf okkur leyfi til að birta það hér með von um að sem flestir nýti sér það.

Vefurinn Fjölbreyttar kennsluaðferðir fyrir fjöruga krakka

Vefurinn Fjölbreyttar kennsluaðferðir fyrir fjöruga krakka er vettvangur þar sem foreldrar, kennarar og aðrir sem vinna með börnum geta nálgast fjölbreytt námsefni. Þarna inni eru skjöl til að hlaða niður með fjölbreyttu námsefni fyrir börn.

Hlín Magnúsdóttir sérkennari á yngsta stigi í grunnskóla er hér að deila því námsefni sem hún hefur útbúið sjálf. Jafnframt er hún með facebook-síðuna Fjölbreyttar kennsluaðferðir fyrir fjöruga krakka (http://www.facebook.com/kennsluadferdir) eða Instragram fjolbreytt_kennsla (http://www.instagram.com/fjolbreytt_kennsla).

Munið hann Sleipni sem er lestrarfélagi barnanna

Bókmenntaborgin hefur gert Sleipnir, hinn áttfætta goðsagnahest, að lestrarfélaga sínum og allra barna. Sleipnir tekur þátt í verkefnum sem snúa að lestrarhvatningu og skapandi starfi barna og ungmenna. Nánari umfjöllun má finna hér:  Sleipnir – lestrarfélaga barnanna. Þar er fjallað um hugmyndina á bak við verkefnið, bækur um Sleipnir og kynningarmyndbönd.

Áfram íslenska – staða og framtíð íslenskukennslu í skólum landsins

Þann 1. apríl 2019 skipulagði mennta- og menningarmálaráðuneytið ráðstefnu um íslenskukennslu í skólum landsins í samvinnu við Háskóla Íslands, Háskólann á Akureyri, Kennarasambands Íslands og Samband íslenskra sveitarfélaga.

Þeir sem ekki komust á ráðstefnuna geta horft á upptöku af henni inn á vef stjórnarráðs Íslands, undir nafninu Áfram íslenska.

Ráðstefnugestir fengu meðal annars bókamerki sem á stóð. ,,Lesum, skrifum, tölum, sköpum, grínumst, hrópum, hvíslum, snöppum, rýnum, hugsum, smíðum ný orð og fögnum á okkar máli. Allt er hægt á íslensku.“